കൊറോണ വൈറസിനെക്കുറിച്ചുള്ള തെറ്റായ വിവരങ്ങളും ശരികളും (കോവിഡ് -19)

കെട്ടുകഥ: നിങ്ങൾക്ക് ആന്‍റിബയോട്ടിക്കുകളോ ആന്‍റിമലേറിയൽ മരുന്നുകളോ ഉപയോഗിച്ച് കൊറോണ വൈറസ് ചികിത്സിക്കാം

വസ്‌തുത:  കൊറോണ വൈറസിന് ഇതുവരെ വാക്‌സുനോ ചികിത്സയോ ലഭ്യമല്ല.

ലോകമെമ്പാടുമുള്ള ഗവേഷകർ വൈറസിന് ഒരു വാക്‌സിൻ വികസിപ്പിക്കാൻ കഠിനമായി പരിശ്രമിക്കുകയാണ്. നിരവധി വാക്‌സിൻ കാൻഡിഡേറ്റുകൾ നിലവിൽ ഗവേഷണ പരീക്ഷണങ്ങളിലാണ്. എന്നിരുന്നാലും, വാക്‌സിൻ വികസിപ്പിക്കുന്നതിന് എത്ര കാലമെടുക്കുമെന്ന് നമുക്ക് അറിയില്ല.

കൊറോണ വൈറസിനെ ചികിത്സിക്കാൻ സഹായിക്കുന്ന പുതിയതും നിലവിൽ ലഭ്യമായതുമായ മരുന്നുകളുടെ ഉപയോഗവും ഗവേഷകർ പരിശോധിക്കുന്നു. ഉദാഹരണത്തിന്, കടുത്ത COVID-19 ഉള്ളവരെ ചികിത്സിക്കാൻ ഓസ്‌ട്രേലിയയിൽ റെംഡെസിവിർ എന്ന ആന്‍റി വൈറൽ മരുന്നിന് താൽക്കാലിക അനുമതി ലഭിച്ചിട്ടുണ്ട്. സന്ധിവാതം, മലേറിയ, എച്ച്ഐവി എന്നിവയ്ക്കുള്ള ചികിത്സകളും പരിശോധിക്കപ്പെടുന്ന മറ്റ് മരുന്നുകളിൽ ഉൾപ്പെടുന്നു. ഈ മരുന്നുകൾ കൊറോണ വൈറസിനെ സുഖപ്പെടുത്തുകയില്ല, പക്ഷേ അവ വൈറസ് ബാധിക്കുന്ന ആളുകളുടെ എണ്ണവും കേസുകളുടെ തീവ്രതയും കുറയ്ക്കും.

അതിനാൽ, കൈയുടെയും ശ്വസന സംവിധാനത്തിന്‍റെയും ശുചിത്വവും ശാരീരിക അകലവും പാലിക്കു‌കയും, വീട്ടിൽ തന്നെ കഴിയുകയും, സുഖമില്ലെങ്കിൽ പരിശോധനയ്ക്ക് വിധേയമാകുകയും ചെയ്യേണ്ടതുണ്ട്, കൂടാതെ നിങ്ങൾ കാര്യമായ കമ്മ്യൂണിറ്റി ട്രാൻസ്‌മിഷൻ ഉള്ള ഒരു പ്രദേശത്താണെങ്കിൽ, പ്രത്യേകിച്ചും ശാരീരിക അകലം പാലിക്കാൻ പ്രയാസമുള്ളപ്പോൾ ഒരു മാസ്‌ക്കും ധരിക്കേണ്ടതുണ്ട്.

കെട്ടുകഥ: കുട്ടികൾ COVID-19-ന്‍റെ ‘സൂപ്പർ സ്പ്രെഡർമാരാണ്’

വസ്‌തുത:  ചെറിയ കുട്ടികൾ സാധാരണയായി ഇൻഫ്ലുവൻസ പോലുള്ള അണുക്കളുടെയും ബഗുകളുടെയും ‘സൂപ്പർ സ്പ്രെഡർമാർ’ ആണെന്ന് അറിയാമെങ്കിലും, COVID-19-ന്‍റെ നിലവിലെ തെളിവുകൾ സൂചിപ്പിക്കുന്നത് സ്‌കൂളുകളിൽ കുട്ടികളിൽ നിന്ന് കുട്ടികളിലേക്ക് പകരുന്നത് സാധാരണമല്ല എന്നാണ്. കൂടാതെ, ഈ വൈറസിന്‍റെ പ്രധാന വ്യാപനം കൊച്ചു കുട്ടികളിലാണ് സംഭവിച്ചതെന്ന് കാണിക്കുന്ന ഒരു വിവരവും ലോകത്ത് എവിടെയും ലഭ്യമല്ല. ഇത് സാധ്യമാണെങ്കിലും, കുട്ടികൾ COVID-19-ന് കാരണമാകുന്ന വൈറസിന്‍റെ സൂപ്പർ സ്പ്രെഡർമാർ അല്ലെന്ന് നിലവിൽ ലഭ്യമായ തെളിവുകൾ സൂചിപ്പിക്കുന്നു.

കെട്ടുകഥ: ഓസ്‌ട്രേലിയക്ക് ആവശ്യമായ മെഡിക്കൽ ഉപകരണങ്ങളും സപ്ലെകളും കരസ്ഥമാക്കാനായില്ല (വെന്‍റിലേറ്ററുകൾ, മാസ്‌കുകൾ, ടെസ്റ്റിംഗ് കിറ്റുകൾ)

വസ്‌തുത:  കർവ് ഫ്ലാറ്റൻ ചെയ്യുന്നതിൽ ഓസ്ട്രേലിയ വളരെ വിജയിച്ചു, അതിനർത്ഥം നമ്മുടെ ആശുപത്രികളിൽ രോഗികൾ വർദ്ധിക്കുന്നത് നമ്മൾ ഒഴിവാക്കി എന്നാണ്.

ഓസ്‌ട്രേലിയയിൽ ഞങ്ങൾക്ക് ധാരാളം വ്യക്തി സുരക്ഷ ഉപകരണങ്ങൾ (PPE) ലഭ്യമാണ്, ഇപ്പോൾ കൂടുതൽ ഉപകരണങ്ങൾ ഓസ്‌ട്രേലിയയിൽ തന്നെ ഉൽ‌പാദിപ്പിക്കുകയും എല്ലായ്‌‌പ്പോഴും ഓസ്‌ട്രേലിയയിൽ തന്നെ വിതരണം ചെയ്യുകയും ചെയ്യുന്നു. ഉദാഹരണത്തിന്, നാഷണൽ മെഡിക്കൽ സ്റ്റോക്ക്പൈലിൽ ആവശ്യത്തിന് സാധനങ്ങൾ സംഭരിച്ച് വച്ചിട്ടുണ്ട്, മാത്രമല്ല 2021 വരെ ഘട്ടംഘട്ടമായി ലഭിക്കത്ത വിധത്തിൽ അര ബില്ല്യണിലധികം മാസ്‌കുകൾക്കായി ഓർഡർ നൽകിയിട്ടുമുണ്ട്.

COVID-19 ടെസ്റ്റിംഗ് ആവശ്യകതകളെ കുറിച്ചുള്ള മാർഗ്ഗനിർദ്ദേശം വിലയിരുത്തുന്നതിനായി, COVID-19 മഹാമാരിയോടുള്ള നമ്മുടെ പൊതുജനാരോഗ്യ പ്രതികരണത്തെ പിന്തുണയ്ക്കുന്നതിന് അവശ്യ പരിശോധനകൾ നടത്തുന്നുവെന്ന് ഉറപ്പാക്കുന്നതിന്, കമ്മ്യൂണിക്കബിൾ ഡിസീസ് നെറ്റ്‌വർക്ക് ഓസ്‌ട്രേലിയ, പബ്ലിക് ഹെൽത്ത് ലബോറട്ടറി നെറ്റ്‌വർക്ക് എന്നിവയുൾപ്പെടെ ഓസ്‌ട്രേലിയൻ ഗവൺമെന്‍റിന്‍റെ ഉപദേശക സമിതികൾ പതിവായി കൂടിക്കാഴ്‌ച നടത്തുന്നു.

കെട്ടുകഥ: COVID-19 മൂലമുള്ള വർദ്ധിച്ച ആവശ്യകതകളെ നേരിടാൻ ഓസ്‌ട്രേലിയയിലെ ആശുപത്രികൾക്ക് കഴിയില്ല

വസ്‌തുത:  കർവ് ഫ്ലാറ്റൻ ചെയ്യുന്നതിൽ ഓസ്ട്രേലിയ വളരെ വിജയിച്ചു, അതിനർത്ഥം നമ്മുടെ ആശുപത്രികളിൽ രോഗികൾ വർദ്ധിക്കുന്നത് നമ്മൾ ഒഴിവാക്കി എന്നാണ്. COVID-19 മഹാമാരിയുടെ കാലത്ത് അധിക ആവശ്യങ്ങൾ നിറവേറ്റാൻ തക്ക ശേഷിയുള്ള ഒരു ലോകോത്തര ആരോഗ്യ സംവിധാനമാണ് ഓസ്‌ട്രേലിയയിലുള്ളത്. ഓസ്‌ട്രേലിയൻ ഗവൺമെന്‍റും സംസ്ഥാന, പ്രവിശ്യാ സർക്കാരുകളും സ്വകാര്യ ആരോഗ്യ മേഖലയും തമ്മിലുള്ള പങ്കാളിത്തത്തിലൂടെ അധിക ആശുപത്രി കിടക്കകൾ, മെഡിക്കൽ ഉപകരണങ്ങൾ, സപ്ലൈസ്, മെഡിക്കൽ സ്റ്റാഫ് എന്നിവയ്ക്കുള്ള ശേഷി ഇതിൽ ഉൾപ്പെടുന്നു.

കെട്ടുകഥ: രണ്ടാഴ്‌ചത്തെ ലോക്ക്‌ഡൗൺ COVID-19-ന്‍റെ വ്യാപനം തടയും

വസ്‌തുത:  രണ്ടോ മൂന്നോ ആഴ്‌ച നിയന്ത്രണങ്ങൾ ഏർപ്പെടുത്തുകയും അവ പിൻവലിച്ച് സാധാരണ ജീവിതത്തിലേക്ക് മടങ്ങുകയും ചെയ്യുന്നത് COVID-19-ന്‍റെ വ്യാപനം തടയില്ല.

COVID-19 ഉള്ള ഭൂരിഭാഗം ആളുകൾക്കും നേരിയ രോഗലക്ഷണളോ രോഗലക്ഷണങ്ങൾ ഒന്നും തന്നെയില്ലാത്ത അവസ്ഥയാണ് ഉള്ളത്. രണ്ടാഴ്‌ചത്തെ ലോക്ക്‌ഡൗണിന്‍റെ അപകടസാധ്യത, ലോക്ക്ഡൗണിന് ശേഷം എല്ലാം തുറക്കുമ്പോൾ രോഗലക്ഷണമില്ലാത്ത COVID-19 ഉള്ള ആളുകളിൽ നിന്ന് അറിയാതെ തന്നെ മറ്റ് ആളുകളിലേക്ക് വൈറസ് വ്യാപിച്ചേക്കാം.

കൈയുടെയും ശ്വസന സംവിധാനത്തിന്‍റെയും ശുചിത്വവും ശാരീരിക അകലവും പാലിക്കലും, വീട്ടിൽ തന്നെ കഴിയുന്നതും, സുഖമില്ലെങ്കിൽ പരിശോധനയ്ക്ക് വിധേയമാകുന്നതും, നിങ്ങൾ കാര്യമായ കമ്മ്യൂണിറ്റി ട്രാൻസ്‌മിഷൻ ഉള്ള ഒരു പ്രദേശത്താണെങ്കിൽ, പ്രത്യേകിച്ചും ശാരീരിക അകലം പാലിക്കാൻ പ്രയാസമുള്ളപ്പോൾ ഒരു മാസ്‌ക്കും ധരിക്കുന്നതുമാണ് COVID-19-ന്‍റെ വ്യാപനം മന്ദഗതിയിലാക്കാൻ സഹായിക്കുന്നതിനുള്ള ഏറ്റവും മികച്ച മാർഗം.

ഞങ്ങളുടെ ആരോഗ്യ വിദഗ്‌ധർ ഓസ്‌ട്രേലിയയിൽ ഓരോ ദിവസത്തെയും പുതിയ കേസുകളുടെ എണ്ണം നിരീക്ഷിക്കുന്നതും തുടരും. തെളിവുകളുടെ അടിസ്ഥാനത്തിൽ പുതിയ നിയമങ്ങളോ നിയന്ത്രണങ്ങളോ നടപ്പിലാക്കുന്നതിനുള്ള ശുപാർശകൾ അവർ നൽകും. എല്ലാവരും www.australia.gov.au വെബ്‌സൈറ്റ് സന്ദർശിച്ച് നിലവിലെ ഏറ്റവും പുതിയ നിയന്ത്രണങ്ങളെ കുറിച്ച് അറിഞ്ഞിരിക്കണം.

കെട്ടുകഥ: എല്ലാവരേയും പരിശോധിക്കുന്നത് കൊറോണ വൈറസിന്‍റെ വ്യാപനം തടയും

വസ്‌തുത:  പരിശോധന വൈറസിന്‍റെ വ്യാപനം തടയുന്നില്ല.

COVID-19 തടയുന്നതിനും നിയന്ത്രിക്കുന്നതിനുമുള്ള അടിസ്ഥാന മാർഗ്ഗങ്ങളിലൊന്ന് സമയബന്ധിതവും അളക്കാവുന്നതും കൃത്യമായതുമായ ഡയഗ്നോസ്റ്റിക് പരിശോധനയാണ്. രോഗത്തിന്‍റെ പകർച്ചവ്യാപനം നിർവചിക്കുന്നതിലും, കേസുകൾ കണ്ടെത്തുന്നതിലും, കോണ്ടാക്റ്റ് മാനേജ്‌മെന്‍റ് നിർവഹിക്കുന്നതിലും, ആത്യന്തികമായി വൈറൽ ബാധ കുറയ്ക്കുന്നതിലും ഡയഗ്നോസ്റ്റിക് പരിശോധന നിർണ്ണായക പങ്ക് വഹിക്കുന്നു.

എന്നിരുന്നാലും, COVID-19 ഫലം നെഗറ്റീവ് ആയി വരുന്നത് നിങ്ങൾ അപകടത്തിലല്ലെന്നോ മറ്റുള്ളവർ അപകടത്തിലാണെന്നോ അർത്ഥമാക്കുന്നില്ല. SARS-CoV-2 (COVID-19-ന് കാരണമാകുന്ന വൈറസ്) സമ്പർക്കം ഉണ്ടായ ശേഷം നിങ്ങൾക്ക് COVID-19 നെഗറ്റീവായ ഫലം ലഭിച്ചേക്കും, എന്നാൽ അത് നിങ്ങളിൽ രോഗലക്ഷണങ്ങൾ പ്രകടമാകുന്നതിന് മുൻപാണ്. അത് കൊണ്ടാണ് നല്ല ശുചിത്വവും ശാരീരിക അകലവും പാലിക്കേണ്ടതും, അസുഖം അനുഭവപ്പെടുമ്പോൾ വീട്ടിൽ തന്നെ കഴിയേണ്ടതും വളരെ പ്രധാനമാകുന്നത്. ടാർഗെറ്റ് ചെയ്‌തുള്ള പരിശോധനയ്‌ക്കൊപ്പം ഈ പ്രവർത്തനങ്ങൾ COVID-19-ഉം മറ്റ് പകർച്ചവ്യാധികളും പകരുന്നത് തടയാൻ സഹായിക്കുന്നു, ഇത് ഓസ്‌ട്രേലിയൻ ആരോഗ്യ സംവിധാനത്തിന് മേലുള്ള സമ്മർദ്ദം കുറയ്ക്കുന്നു.

ഒരു പ്രദേശത്തെ വർദ്ധിച്ചുവരുന്ന കേസുകളുടെ എണ്ണവും രോഗ വ്യാപനവും പൊതു ജനാരോഗ്യ മാനേജ്‌മെന്‍റിലൂടെ വിജയകരമായി കൈകാര്യം ചെയ്യാൻ, പകർച്ചവ്യാധി നിയന്ത്രണം നിലനിർത്തുന്നതിനും ലബോറട്ടറിയുടെ സുസ്ഥിരത പരിരക്ഷിക്കുന്നതിനും സൈറ്റ് ശേഷി പരിശോധിക്കുന്നതിനും ഇടയിൽ ശരിയായ സന്തുലിതാവസ്ഥ നിലനിർത്താൻ പരിശോധനകൾ ശ്രദ്ധാപൂർവ്വം നിർവഹിക്കേണ്ടതുണ്ട്.

രോഗലക്ഷണങ്ങളൊന്നും കാണിക്കാത്ത ഓസ്‌ട്രേലിയക്കാരുടെ വ്യാപകമായ പരിശോധന (അസിംപ്റ്റോമാറ്റിക്) ശക്തമായി നിരുത്സാഹപ്പെടുത്തുന്നു. ഈ പരിശോധന തന്ത്രം എപ്പിഡെമിയോളജിക്കലായി കൃത്യമോ രോഗം പകരുന്നത് തിരിച്ചറിയുന്നതിനുള്ള ചെലവ് കുറഞ്ഞ സമീപനമോ അല്ല. രോഗ നിയന്ത്രണത്തിനും നിരീക്ഷണ ആവശ്യങ്ങൾക്കുമായി പ്രത്യേക സന്ദർഭങ്ങളിൽ അസിംപ്റ്റോമാറ്റിക് പരിശോധനയ്ക്ക് ഒരു പങ്കുണ്ടെന്ന് ഓസ്‌ട്രേലിയൻ സർക്കാർ തിരിച്ചറിയുന്നു. രോഗവ്യാപന സാഹചര്യങ്ങളിൽ, രോഗം കുറവായി റിപ്പോർട്ട് ചെയ്‌ത ഇടങ്ങളിൽ ഉയർന്ന വ്യാപന സാധ്യതയുള്ള ജനസംഖ്യ, എക്സ്പോഷർ സാധ്യത വളരെ കൂടുതലുള്ള ജനസംഖ്യ, ഉയർന്ന വ്യാപന സാധ്യതയുള്ള സാഹചര്യങ്ങളിൽ ഗുരുതരമായ രോഗ ബാധയുണ്ടാകാൻ സാധ്യതയുള്ള ആളുകൾ എന്നിവ ഉൾപ്പെടെ.

ബന്ധപ്പെട്ട പൊതുജനാരോഗ്യ അധികാരികളുമായും ലബോറട്ടറി ഡയറക്‌ടർമാരുമായും കൂടിയാലോചിച്ച് അസിംപ്റ്റോമാറ്റിക് ആളുകൾക്കായി ജോലിസ്ഥലത്തെ സ്ക്രീനിംഗ് പ്രോഗ്രാമുകൾ ഉൾപ്പെടെയുള്ള പരീക്ഷണ തന്ത്രങ്ങൾ വികസിപ്പിക്കണമെന്ന് ഓസ്ട്രേലിയൻ സർക്കാർ ശുപാർശ ചെയ്യുന്നത് തുടരുന്നു. ഏറ്റവും ഉചിതമായതും ഫലപ്രദവുമായ സമീപനങ്ങൾ നടപ്പിലാക്കുന്നുവെന്ന് ഉറപ്പാക്കാനാണിത്. വ്യാപകമായ അസിംപ്റ്റോമാറ്റിക് ടെസ്റ്റിംഗ് സംബന്ധിച്ച് ഓസ്‌ട്രേലിയൻ ഗവൺമെന്‍റിന്‍റെ നിലപാടിനെക്കുറിച്ചുള്ള കൂടുതൽ വിവരങ്ങൾക്ക്, ദയവായി ഡിപ്പാർട്ട്‌മെന്റ് ഓഫ് ഹെൽത്ത് വെബ്‌സൈറ്റ് കാണുക.

കെട്ടുകഥ: ടെസ്റ്റിംഗ് കിറ്റുകൾ കൃത്യമല്ല

വസ്‌തുത:  ഓസ്‌ട്രേലിയയിൽ, COVID-19 പരിശോധനകൾ വളരെ കൃത്യമാണ്. ഓസ്‌ട്രേലിയയിൽ ഉപയോഗിക്കുന്ന എല്ലാ പരിശോധന രീതികളും സമഗ്രമായി വിലയിരുത്തപ്പെടുന്നതാണ്. തെറാപ്യൂട്ടിക്ക് ഗുഡ്‌സ് അഡ്‌മിനിസ്ട്രേഷൻ (ടി‌ജി‌എ) അവ സൂക്ഷ്‌മമായി നിരീക്ഷിക്കുന്നത് തുടരുന്നുതിലൂടെയും, SARS-CoV-2-നായി (COVID-19-ന് കാരണമാകുന്ന വൈറസ്) പ്രത്യേകമായി വികസിപ്പിച്ചെടുത്ത ഗുണനിലവാരം ഉറപ്പ് വരുത്തൽ പ്രോഗ്രാമുകളിൽ നിർബന്ധിത പങ്കാളിത്തം വഴിയും.

ഓസ്‌ട്രേലിയയിൽ, നിങ്ങളുടെ ശരീരത്തിലെ സൂക്ഷ്‌മമായ SARS-CoV-2 അണുബാധ നിർണ്ണയിക്കാൻ ഉപയോഗിക്കുന്ന ഗോൾഡ് സ്റ്റാൻഡേർഡ് ടെസ്റ്റാണ് ലബോറട്ടറി അധിഷ്‌ഠിത പോളിമറേസ് ചെയിൻ റിയാക്ഷൻ ടെസ്റ്റിംഗ് (PCR), ഈ പരിശോധന നിർവഹിക്കാൻ ഒരു ശ്വസന സാമ്പിൾ ശേഖരണം ആവശ്യമാണ്. PCR പരിശോധനകൾ‌ വളരെ സെൻ‌സിറ്റീവ് ആണ്, ശ്വസന സാമ്പിളിൽ‌ നിന്ന് SARS-CoV-2-ന് നിർ‌ദ്ദിഷ്‌ടമായ ഏറ്റവും ചെറിയ ജനിതക ശകലങ്ങൾ‌ അത് കണ്ടെത്തുന്നു.

ഫലങ്ങളുടെ ഗുണനിലവാരവും വിശ്വാസ്യതയും ഉറപ്പുവരുത്തുന്നതിനും നിയമപരമായ വിതരണം പ്രാപ്പ്‌തമാക്കുന്നതിനും TGA വളരെ ശ്രദ്ധാപൂർവ്വം വിലയിരുത്തൽ നടത്തേണ്ടതുണ്ട്. ചികിത്സാ ഉൽപ്പന്നങ്ങളുടെ ഓസ്‌ട്രേലിയൻ രജിസ്റ്ററിൽ ഏത് കോവിഡ്-19 ടെസ്റ്റുകൾ ഉൾപ്പെടുത്തിയിട്ടുണ്ട് എന്നതിന്‍റെ ഏറ്റവും പുതിയ വിവരങ്ങൾക്ക്, ദയവായി TGA-യുടെ വെബ്‌സൈറ്റ് സന്ദർശിക്കുക: www.tga.gov.au/covid-19-test-kits-included-artg-legal-supply-australia.

കെട്ടുകഥ: കൊറോണ വൈറസ് ഒരു തട്ടിപ്പാണ്

വസ്‌തുത: മനുഷ്യരിലും മൃഗങ്ങളിലും ശ്വാസകോശ സംബന്ധമായ അണുബാധകൾക്ക് കാരണമാകുന്ന വൈറസുകളുടെ ഒരു വലിയ കുടുംബത്തിന്‍റെ ഭാഗമായ കൊറോണ വൈറസ് (SARS-CoV-2) മൂലമാണ് COVID-19 ഉണ്ടാകുന്നത്. ജലദോഷം മുതൽ ഗുരുതരമായ രോഗം വരെ ഈ അണുബാധകൾ ഉണ്ടാകാം. COVID-19 ഒരാളിൽ നിന്ന് മറ്റൊരാളിലേക്ക് ജലകണങ്ങൾ വഴിയും മലിനമായ ഉപരിതലങ്ങൾ വഴിയും വ്യാപിക്കുന്നു.

ഓസ്‌ട്രേലിയയിൽ, പീറ്റർ ഡോഹെർട്ടി ഇൻസ്റ്റിറ്റ്യൂട്ട് ഫോർ ഇൻഫെക്ഷൻ ആൻഡ് ഇമ്മ്യൂണിറ്റിയിലെ വിക്ടോറിയൻ ഇൻഫക്ഷ്യസ് റഫറൻസ് ലബോറട്ടറി (VIDRL) ചൈനയ്ക്ക് പുറത്ത് SARS-CoV-2 വേർതിരിച്ച ആദ്യത്തെ ലബോറട്ടറിയാണ്. COVID-19 നായുള്ള ഡയഗ്നോസ്റ്റിക് ടെസ്റ്റുകളുടെ വികസനം, സാധൂകരണം, പരിശോധന എന്നിവ സാധ്യമാക്കുന്നതിനായി VIDRL മറ്റ് ഓസ്‌ട്രേലിയൻ ലബോറട്ടറികളുമായും ലോകാരോഗ്യ സംഘടനയുമായും മറ്റ് രാജ്യങ്ങളുമായും വേർതിരിച്ച വൈറസ് പങ്കുവച്ചു.

SARS-CoV-2 കണ്ടുപിടിക്കുന്നതിനും സ്ഥിരീകരിക്കുന്നതിനുമുള്ള കഴിവും ഉചിതമായ അക്രഡിറ്റേഷനും ഉള്ള പൊതു, സ്വകാര്യ പാത്തോളജി ലബോറട്ടറികളുടെ വിദഗ്ദ്ധ ശൃംഖലയുടെ പിന്തുണ ലഭിക്കുന്നതിൽ ഓസ്‌ട്രേലിയയ്ക്ക് ഭാഗ്യമുണ്ട്. കർവ് ഫ്ലാറ്റൻ ചെയ്യുന്നതിലും മറ്റ് രാജ്യങ്ങളിൽ കാണപ്പെടുന്നതിൽ നിന്ന് വിഭിന്നമായി വിനാശകരമായ അണുബാധ നിരക്ക് ഒഴിവാക്കുന്നതിലും ഓസ്‌ട്രേലിയയുടെ വിജയത്തിനായി ടെസ്റ്റിംഗ് ശേഷി വർദ്ധിപ്പിക്കാനും ഈ ലബോറട്ടറികളുടെ കഴിവ് അനിവാര്യമാണ്. COVID-19 ഉള്ള ആളുകളുടെ എണ്ണം, രോഗം ബാധിച്ച് മരിച്ചവരുടെ എണ്ണം എന്നിവയെ കുറിച്ചുള്ള വിവരങ്ങൾ ഓസ്‌ട്രേലിയയിലും ലോകമെമ്പാടും ശേഖരിക്കുന്നു. ഈ ഡാറ്റ ഓസ്‌ട്രേലിയൻ ഡിപ്പാർട്ട്‌മെന്‍റ് ഓഫ് ഹെൽത്ത് ദിനവും പ്രസിദ്ധീകരിക്കുന്നു.

കെട്ടുകഥ: മാസ്‌കുകൾ ഫലപ്രദമല്ലാത്തതും കൂടാതെ/അല്ലെങ്കിൽ സുരക്ഷിതമല്ലാത്തതുമാണ്.

വസ്‌തുത:  നല്ല ശുചിത്വം, ശാരീരിക അകലം പാലിക്കൽ, സുഖമില്ലാത്തപ്പോൾ വീട്ടിൽ കഴിയുകയും പരിശോധന നടത്തുകയും ചെയ്യുക തുടങ്ങിയ മറ്റ് മുൻകരുതലുകൾക്കൊപ്പം മാസ്‌ക്കുകൾ ഉപയോഗിക്കുമ്പോൾ, COVID-19-ന്‍റെ വ്യാപനം മന്ദഗതിയിലാക്കാൻ കഴിയുന്നു.

മിക്ക ശ്വസന വൈറസുകളെയും പോലെ, SARS-CoV-2 (COVID-19 ന് കാരണമാകുന്ന വൈറസ്) പ്രധാനമായും പടരുന്നത് വൈറസ് അടങ്ങിയ ജലകണങ്ങളിലൂടെയാണ്, ഇത് രോഗബാധിതനായ ഒരാൾ സംസാരിക്കുമ്പോഴോ ചുമയ്ക്കുമ്പോഴോ അല്ലെങ്കിൽ തുമ്മുമ്പോഴോ ഉണ്ടാകുന്നു. മലിനമായ പ്രതലങ്ങളിലൂടെയും വ്യാപനം സംഭവിക്കാം. രോഗലക്ഷണങ്ങൾ ഉള്ളതോ ഇല്ലാത്തതോ ആയ COVID-19 ഉൾപ്പെടെയുള്ള ശ്വാസകോശ വൈറൽ അണുബാധയുള്ള ഒരു വ്യക്തിക്ക് മാസ്‌ക്ക് ഉപയോഗിക്കാം. COVID-19 ഉൾപ്പെടെയുള്ള ശ്വാസകോശ സംബന്ധമായ അണുബാധയുള്ള ഒരാളിൽ നിന്ന് ശാരീരിക അകലം പാലിക്കാൻ കഴിയാതെ വരുമ്പോൾ സ്വയം സംരക്ഷിക്കാൻ ആരോഗ്യ, പരിചരണ തൊഴിലാളികൾ മാസ്‌കുകൾ ഉപയോഗിക്കുന്നു.

COVID-19-ന്‍റെ വ്യാപനം മന്ദഗതിയിലാക്കുന്നതിനുള്ള ഒരു ഘട്ടം മാത്രമാണ് മാസ്‌ക് ധരിക്കുന്നത്, ഇത് മറ്റ് മുൻകരുതലുകൾക്ക് പകരമാവില്ല. കൈകളുടെയും ശ്വസന സംവിധാനത്തിന്‍റെയും ശുചിത്വവും ശാരീരിക അകലം പാലിക്കുന്നതും, വീട്ടിൽ തന്നെ കഴിയുന്നതും, സുഖമില്ലെങ്കിൽ പരിശോധനയ്ക്ക് വിധേയമാകുന്നതും തുടരേണ്ടത് പ്രധാനമാണ്.

മാസ്‌ക് ധരിക്കുന്നത് സുരക്ഷിതമല്ലെന്നോ ഓക്‌സിജന്‍റെ അഭാവം പോലുള്ള പ്രശ്‌നങ്ങളിലേക്ക് നയിക്കുമെന്നോ ഉള്ള വാദങ്ങൾക്ക് തെളിവുകളൊന്നുമില്ല. ആരോഗ്യ പരിചരണ ദാതാക്കൾ ഈ പ്രശ്‌നങ്ങളില്ലാതെ നിരവധി വർഷങ്ങളായി മാസ്‌ക്കുകൾ ധരിക്കുന്നു.

 

 

COVID-19–നോടുള്ള ഓസ്‌ട്രേലിയൻ ഗവൺമെന്‍റിന്‍റെ പ്രതികരണത്തിലെ പ്രധാന സംഭവവികാസങ്ങളെക്കുറിച്ച് അറിയാൻ പതിവായി ഈ വെബ്‌സൈറ്റ് സന്ദർശിക്കുക.

നിങ്ങളുടെ ഭാഷയിൽ‌ COVID-19 നെക്കുറിച്ചുള്ള നിരവധി വിവരങ്ങളും SBS-ന്‍റെ പക്കലുണ്ട്. സർക്കാർ വിവരങ്ങൾ വിവർത്തനം ചെയ്യുന്നതിന് മൊബൈൽ ഫോൺ ആപ്പുകളും ബ്രൗസർ എക്‌സ്റ്റൻഷനുകളും നിങ്ങൾക്ക് ഉപയോഗിക്കാവുന്നതാണ്. നിങ്ങളുടെ ആവശ്യങ്ങൾ നിറവേറ്റുന്ന ഒന്നിനായി തിരയുക.

ഇംഗ്ലീഷിലുള്ള അധിക വിവരങ്ങൾ ആക്‌സസ് ചെയ്യാൻ, www.australia.gov.au സന്ദർശിക്കുക.