Sehét

Sehéti Maalumat

Zodi tuñáttu hótórnak alamot ókkol zeén neki niyác or mockilat tákíle, meérbáni gorí 000 ot koól goró joldi elaji modot ollá.

Korunaváires or alamot ókkol ót cáamel asé:

  • zor
  • hañcáni
  • golar bic
  • baçí niyác.

Oinno alamot ókkol ót cíyoinná nak, matáhoñri, gusso yá girá bic, hoo goráni, oolani, háñir bac nobuzá, moza buzí nofará, búk nolaga adde hóiráni cáamel asé.

Zodi tuñí bearam óile ar tuñáttu korunaváires aséfán legilé, elaji modot soó.

Beec maalumat ollá, Wotóni Korunaváires Modotlain oré 1800 020 080 ot koól gorífaribá. Tuñár zuban ot ekzon buzái doiyar modot lagilé, koól goró ibát 131 450.

Sehét Dhipármén or wébsáith ot maalumat or ekkán sílsilá asé Ingrazi baade oinno zuban ot taáke manúic óre maháfuz tákíte modot goríbólla ar sómáj óttu hótóra ókkol óre homaibólla.

Zubani asbab ókkol mozíd faazaibou eçé www.sbs.com.au/language/coronavirus

KOVID-19 or cek adde dabai gorá

Zodiyó tuñáttu oggwá víza nái, yáto tuñár vízar ki abostá tuñúi fakka nozanó, tuñáttu umumi sehéti hédáyot ókkol manaforibó. Tuñáttu zodi aram nolagilé ar alamot ókkol tákíle, zeddúr hálka óibó óuk, tuñáttu elaji díyan diya soónsá ar KOVID-19 cek goróonsá.

Tuñárloi ekbere hañsé KOVID-19 niyác or rastar kiliník tuwai soó.

Maháfuz tákó

  • Hámicá jisími sófáyir amól goró, sábún adde fání loi 20 sekén tuñár hát ókkol dúwó, hañcáni ré zafái raikkó, souk, nak adde gal dóróon óttu basi táikko.
  • Zehón gór or baáré óiba, homot 1.5 mithár or jisími duuri (gaa alog) rákíba.
  • Jisími mulakat nogoijjó zeén neki musaba gorá, azaazi gorá ar cuma diya.
  • Umumi garígúra estemal goríle, becí ehétéyat goijjó.
  • Hújúm ókkol adde doñór umumi mojilís ókkol óre porhéz goijjó.
  • Bálágorí zanifúní táikko - siróf biccáci córhári maalumat loiyo. Coronavirus Australia mubáil app lamo, Coronavirus Australia WhatsApp hédmot ot góló, ar taza maalumat ollá www.australia.gov.au ot gólí soó.

Burá Manúic Ókkol Ólla KOVID-19 Modot Lain

Burá Manúic Ókkol Ólla KOVID-19 Modot Lain e maalumat de, modot goré, burá Australian ókkol óre juçái de.

Baáz burá manúic KOVID-19 ór hótórat asé lékin intharnéth loi hítára hom rabeta goijjá ar hítárar hálat ókkol ór babote maalumat or rasta ókkol ór muhútaj. Burá Manúic Ókkol Ólla KOVID-19 Modot Lain é maalumat adde modot de.

Burá Australian ókkol, hítárar fémilí ar dustó adde hédmotgar ókkol é 1800 171 866 ot maana koól gorífare zodi hítára:

  • KOVID-19 or pabondi ókkol adde nizor uore hían or asór or babote kiyór loi hotáhoitóu sailé
  • tonhá yáto ekzon adoijjar babote sinta ehésas goríle
  • honó kiyór saásita goríle, ar honó maalumat dorhar goríle yáto hotá hoibólla kiyóre sailé
  • nize fardde buráburír hédmot ókkol bodolizaar babote modot yá mocwara dorhar goríle
  • saásitar nuwa hédmot ókkol ór rasta faibar modot yáto bazar gorár dhoilla zoruri salani mal ókkol dorhar goríle
  • nizor yáto demagi bearamola ekzon dustó yáto fémilí sáñtir babote sinta goríle
  • nizor yáto oinno kiyór aramiyot ollá ekbarjja yáto niyomi cek gorár entezam gorító sailé.

Burá Australian ókkol, hítárar egena guccí, saásita goróiya, dustó yáto modotgar ókkol é hítárattú lager de maalumat yáto hédmot ókkol ólla AEST thiam biínna 8:30 – házuinna 6 or bútóre 1800 171 866 ot koól gorífaribó.

Hákíkotnama okkol