Faʻamatalaga le saʻo ma faʻamatalaga tonu e uiga i le Koronavairasi 

SESE: E mafai ona togafitia le koronavairasi i fualaau ma vailaau

MONI: E leʻo iai se vailaau poo se togafitiga mo le koronavairasi i le taimi nei.

O loʻo galulue malosi tagata suʻesuʻe o le lalolagi e atiaʻe se vailaau mo le siama ae leʻo mautinoa le umi o le a tupu ai. Faʻamoemoe o le va o le 12 i le 18 masina.

O loʻo vaʻavaʻai tagata suʻesuʻe i le faʻaaogaina o vailaau eseʻese e mafai ona fesoasoani i le togafitia o le gasegase e aofia ai le maʻi gugu, malaria ma le faʻamaʻi HIV. E iai le talitonuga o le a le fofoina ai le koronavairasi ae o le a mafai ona faʻaitiitia ai le numera o tagata e maua i le siama ma ona aʻafiaga.

O le mea lea, e taua ai le le nofoaʻi ma faʻatalitali mo se tui poo se togafitiga mo le koronavairasi - ma o le mafuaʻaga lea ua tele ai fesoasoani ma auala eseʻese ua faʻaaogaina e Ausetalia mo tagata lautele.

SESE: O tamaiti o ʻtagata sili ia ona pepesi vave ai le koronavairasi

MONI: E ui ina iai le talitonuga o fanau o "tagata sili ia ona vave pepesi" ai siama ma faʻamaʻi lautele, e leʻo le tulaga lea i le koronavairasi. E leʻo le tulaga lea i le taimi nei. E leʻo iai ni faʻamaumauga i le lalolagi e faʻaalia ai o le faʻasalalauina o lenei siama e mafua mai i tamaiti. Ae, o le manatu e ono tupu lava. E mafai. Ae o loʻo faʻamaonia lava, e le o i latou o ni tagata o faʻapepesiina le koronavairasi.

SESE: E leʻo lava ma mafai e Ausetalia ona maua ni masini faʻapitoa ma ni mea faigaluega (e pei o mea faʻamanava, tali fofoga, masini mo suʻesuʻega o le faʻamaʻi)

MONI: O le tali faigofie mo gasegase, aemaise lava, o tagata tausi soifua o loʻo tausia i latou, - Ioe, o loʻo lava tapena Ausetalia i ana mea faigaluega e tali atu ai i lenei faʻamaʻi. Ae ui i lea, o loʻo iai pea faʻafitauli ona ua sili atu le manaʻoga mo mea faigaluega i le taimi nei nai lo mea faigaluega ua gaosia ma ua avea lea ma mea ua tauau ai ina le lava mea faigaluega e faʻaaoga ona o le tele o manaʻoga i soʻo se itu o le lalolagi.

Ia mautinoa e le aufaigaluega o loʻo i ai pea a tatou mea faigaluega e faʻaaoga mo le puipuia i taimi uma, ma o lona uiga, o le a mafai ona maua pea e tagata gasegase le tausiga lelei o i latou. Mo se faʻataʻitaʻiga, e silia ma le 10 miliona pupuni fofoga (masks) o loʻo i le National Medial Stockpile. O loʻo faʻaauau pea ona galue le Malo o Ausetalia e faʻamautu ma faʻaopoopo mea pupuni fologa (masks) ina ia mautinoa ai le faʻatumauina o lea vaega i le National Medical Stockpile, ma o loʻo i ai ma lava mea faigaluega mo fomaʻi ma tagata faigaluega e faʻaaoga mo latou galuega aʻo feagai ai i tatou ma lenei faʻamaʻi. E aofia ai le faʻamalosia ma le unaina o le tomai ma le poto masani aua le faʻatinoina o galuega.

E tusa e 2,200 moega saunia lelei mo falemaʻi i Ausetalia. I le ono vaiaso ua tuanaʻi, na toe faʻaleleia ma faʻaaogaina ai masini faʻapitoa ma isi masini, ma ua i ai nei le 4,400 moega, ma o le a faʻateleina nei moega i le 7,500. I le amataga o Aperila, e tusa ma le 20 le numera o tagata gasegase i le koronavairasi i totonu o potu maʻi tigaina na manaʻomia ni masini e fesoasoani i le manava.

O loʻo faia pea e le Communicable Disease Network Australia ni feiloaʻiga i aso taʻitasi, e toe iloilo ai lana taʻiala i mea e manaʻomia mo suʻesuʻega, aua le faia o suʻesuʻega talafeagai.

SESE: E le mafai e falemaʻi a Ausetalia ona faʻafeagai ma le tele o manaʻoga a le koronavairasi

MONI: Ua galulue soʻosoʻo tauʻau nei falemaʻi a Ausetalia ma falemaʻi tumaʻoti i le taua faʻasaga i le koronavairasi. I le tala faʻasolopito o Ausetalia, o le faiga paʻaga a le Malo o Ausetalia, ona setete ma teritori ma falemaʻi tumaʻoti, ua maua ai le avanoa mo le 34,000 moega faʻaopoopo ma le 105,000 fomaʻi e fesoasoani ai i le foʻia o lenei faʻamaʻi o le koronavairasi.

Ua tuʻuina atu le fesoasoani a le vaega tumaʻoti e ala atu i auaunaga mo tagata lautele, faia o ana mea faigaluega, moega, aemaise le faʻaavanoaina o le aufaigaluega faʻaopopo mo soʻo se taimi e manaʻomia ai.

O le a faʻaauau pea ona latou lagolagoina manaʻoga o tagata o loʻo taofia i le falemaʻi e ala i le National Disability Insurance Scheme, ma tagata mamaʻi matutua ma tagata lautele e manaʻomia le fesoasoani.

O lenei faiga faʻapaʻaga, o le a faʻamautinoa ai ua saunia uma punaoa o le soifua maloloina o le lalolagi i Ausetalia ma taulaʻi i le togafitia o tagata gasegase e pei ona manaʻomia ile faʻamaʻi.

SESE: E lava le lua vaiaso e taofia ai le salalau o le koronavairasi

MONI: O le siita ai o sa ma tuʻutuʻuga pe a uma le lua pe tolu vaiaso ma toe foʻi i o tatou olaga masani o le a le taofia ai le salalau o le koronavairasi.

O le lamatiaga i le naʻo le lua vaiaso le faʻatapulaʻaina o le sa mo le koronavairasi, o le toe vave faʻafoʻi mai ai le faʻamaʻi, ma o le a sili atu le malosi nai lo le taimi muamua.

Ua fesili nisi tagata pe aisea ua tatou le faia ai se sa e taofia ai mea uma e pei ona faia e isi atunuu. O le tali, e le pei Ausetalia o Italia, Sepania ma Iran, ma aai e pei o Wuhan i Saina, i le mea na amata ai le faʻamai, ona ua muamua Ausetalia i luma e ala i sauniuniga i le teteʻe atu i le faʻamaʻi.

Ua tuai ona iloa e tagata atamamai i le soifua maloloina o nei atunuu le mea ua tupu, ma ua le mafai ona taofiofia le salalau pei o se afi le faʻamaʻi o le koronavairasi. O le mafuaʻaga lea ua faigata ai e falemaʻi o nei atunuʻu ona faʻafeagai ma o latou tagata ua aʻafia ma ogaoga o latou gasegase i le faʻamaʻi.

O le a faʻaauau pea ona mataʻituina e le au atamamai o le soifua maloloina le numera o maʻi fou i aso taʻitasi i Ausetalia ma le nofoaga o loʻo tupu ai. O le a latou faia ni fautuaga e faʻavae i luga o faʻamaoniga maumaututu mo ni tulafono fou poʻo ni tapulaa e ono manaʻomia. E tatau i tagata uma ona nofo silafia ma iloa aiaiga o lenei faʻamaʻi e ala ile asiasi www.australia.gov.au.

SESE: O le suʻesuʻeina o tagata uma o le a taofia ai le salalau o le koronavairasi

MONI: E le taofia e suʻesuʻega le salalau o le siama.

E pei o soʻo se siama, o le COVID-19 e alu ese mai le tasi tagata i le isi. Na o fefaʻasoaʻiga faʻaagafesoʻotaʻi i taimi uma, ma le nofo i le fale pe afai o e maʻi, e mafai ai ona taofia le salalau o le siama.

O suʻesuʻega mo le faʻamaonia o auga o le COVID-19, e fesoasoani tele i le taofia o le salalau o le faʻamaʻi ma faʻaitiitia le feaveaʻiina. Afai tatou te iloa se tasi e iai auga o le maʻi, e tatau ona faʻanofoesea o ia ma e mafai ona tatou vaʻai pe o ai latou te faʻafesoʻotaʻi ina ia faʻaititia le faʻasalalauga ma le lamatia o nisi.

Ae ui i lea, afai na suʻesuʻeina oe ma iloa e te leʻo maʻi i le COVID-19, o le a le avea lena ma ala o le a le lamatia ai oe poʻo nisi foʻi. E mafai ona suʻesuʻeina oe ma iloa e te leʻo maua i le COVID-19, pe a fai sa faʻatasi ma nisi e maua ai aʻo leʻi aliaʻe mai ni faʻamaoniga. E mafai ona faʻamaonia e te leʻo maua i le faʻamaʻi, pe a fai na suʻesuʻeina oe i le COVID-19 ae le taofia ai le maua o oe i le isi aso e sosoʻo ai. O le mafuaʻaga lena e matua taua ai le ola tumama ma le va fealoaloaʻi, ma nofo i le fale seʻi vagana ua e manaʻomia ni mea taua. E fesoasoani tele lena i le puipuia ai o le feaveaʻia o le COVID-19 aemaise ai o isi faʻamaʻi, faʻaitiitia ai le manaʻoga mo a tatou auaunaga faʻalesoifua maloloina.

SESE: O mea faigaluega mo le suʻesuʻeina o le faʻamaʻi e le saʻo atoatoa

MONI: O suʻesuʻega o loʻo iai nei mo le COVID-19 o loʻo faʻaaogaina le mea e taʻua o le acid nucleic amplification (Polymerase Chain reaction (PCR), lea e mautinoa lona saʻo atoatoa. O le suʻesuʻega e aʻafia ai le faʻaaogaina o le faua mai le faʻai ma le isu o le tagata. I le taimi nei, o vaega uma mo suʻesuʻega o loʻo gaosia i atunuʻu i fafo, aemaise i Europa ma Asia. E ui o le tele o tagata suʻesuʻe ma fale suʻesuʻe i totonu o setete ma teritori e faʻaaogaina vaega eseese, o le mea taua ia silafia, e tasi lava le metotia latou te faʻaaogaina i a latou suʻesuʻega. Ae ui i lea, o loʻo iai pea faʻafitauli ona ua sili atu le manaʻoga mo mea faigaluega i le taimi nei nai lo mea faigaluega ua gaosia ma ua avea lea ma mea ua tauau ai ina le lava mea faigaluega e faʻaaoga ona o le tele o manaʻoga i soʻo se itu o le lalolagi. O le puipuiga o le tino e le talafeagai lona faʻaaogaina, ma o lea e le fautuaina ai le faʻaaogaina mo lenei faʻamoemoe.

O loʻo galulue vavalalata le Malo o Ausetalia ma fale gaosi vailaau e auala atu i le Public Health Laboratory Network ma le aufaʻatauoloa ina ia faʻamautuina mea o loʻo manaʻomia mo suʻesuʻega e ono mafai ona mautinoa ai o loo tausia e Ausetalia ma gafatia le suʻesuʻeina o le koronavairasi.

O loʻo avanoa lenei ʻupega tafaʻilagi i taimi uma ina ia nofo silafia tagata uma i uiga o lenei faʻamaʻi ma le tali atu a le Malo o Ausetalia i le COVID-19.

SBS e maua ai foʻi le tele o faʻamatalaga i le COVID-19 i lau lava gagana. E mafai foʻi ona faʻaaoga telefoni feaveaʻi e silafia ai faʻamatalaga mai le malo. Saili pe faʻaaoga soʻo se vaega e fetaui ma ou manaʻoga.

Mo nisi faʻamatalaga faʻaopoopo i le gagana faʻaperetania, asiasi i le www.australia.gov.au.